محمد علي رزق عن وفاة والده: مش قادر أصدق إنه مات وكنت بدور عليه وسط الناس

تحدث الفنان محمد علي رزق خلال لقائه مع الإعلامية يارا أحمد في برنامج "بعد الغياب"، عن تفاصيل إنسانية مؤثرة عن وفاة والده، التي غيّرت مجرى حياته وجعلته أكثر حكمة وهدوءاً، مؤكداً أن الفقد لا يُنسى لكنه يتغير شكله مع مرور الوقت.

وقال محمد علي رزق: "قبل وفاة والدي بيوم كنا سوا، بنضحك ونهزر، وكان مصلي قيام الليل وقاري قرآن وطلع صدقة قبلها بساعة، وبعدها توفى فجأة وهو بيلعب مع حفيدته".

وأضاف: "مكنتش مستوعب، ودخلت عليه وقلتله مش بينا معاد بكرة مش قادر أصدق إنه مات، استوعبت الحقيقة بعد ما دفنّاه ولما قفلوا المقبرة حسيت بالفراغ الحقيقي".

وأوضح "رزق" أن والده كان صديقه في آخر 7 سنوات، بعد علاقة صارمة من الطفولة: "أنا بحاول أكون ليحيى أب وصديق من أول يوم".

وتابع: "مفيش فرحة كاملة يوم فرحي كنت بدور عليه وسط الناس، ويوم ولادة إبني كنت حاسس بالناقص، وهو كان مستني اللحظة دي".

واستكمل عن دعم زوجته نورين بعد الوفاة: "قالتلي مش مهم الفرح المهم أكون جنبك، وسندتني هي وأهلها من أول لحظة، ومروحتش لطبيب نفسي لكن لجأت لربنا، بالصلاة والقرآن والدعاء، وفلترت ناس كتير بعد الوفاة، فيه ناس اختفت وناس قربت أكتر".

واختتم حديثه برسالة مؤثرة: "اشبعوا من أهاليكم، عشان لما يمشوا هتكتشفوا إنكم مشبعتوش، ولو مش قادر تتجاوز افتكر إنهم فوق، مش هيحبوا يشوفوك مكسور".