أحمد عبد العزيز يرد على فيديو "رفض المصافحة": الشاب زي ابني وماخدتش بالي

علق الفنان الكبير أحمد عبد العزيز على الفيديو المتداول الذي ظهر فيه وكأنه يرفض مصافحة شاب خلال مشاركته في مهرجان سينمائي بمركز الإبداع، موضحًا أن ما حدث كان مجرد سوء تفاهم، لا أكثر.

وقال عبد العزيز، في مداخلة هاتفية مع برنامج "العاشرة" على قناة "إكسترا نيوز" مع الإعلامي الدكتور محمد سعيد محفوظ:

"كنت متأخر حوالي 10 دقائق على المهرجان، وبجري علشان ألحق. وأنا داخل الأسانسير، لقيت مجموعة شباب، فشاورتلهم بدماغي كتحية، ودخلت على طول، واضح إن في شاب كان بيحاول يسلم عليا، وأنا بصراحة مخدتش بالي خالص".

وأضاف: "اتفاجئت بعد المهرجان بانتشار الفيديو وتعليقات سلبية كتير، وناس فهمت إنّي رفضت السلام، وده ما حصلش، أنا راجل بسيط جدًا، ومتواضع، ومحصلش في يوم إني اتكبرت على حد، والجمهور ده هو السبب في اللي إحنا فيه".

ووجه عبد العزيز رسالة للشاب الذي ظهر في الفيديو قائلًا:"لو زعل أو خد في خاطره، فهو زي ابني، وأنا مستعد أطيب خاطره وأوضح له اللي حصل. الشباب دول هم أمل مصر، وأنا دايمًا بدعمهم، ومؤمن إنهم الأساس في بناء المستقبل".

واختتم حديثه مؤكدًا: "مصر دايمًا بخير، وهتفضل بخير بشبابها الواعي والمحب لبلده".