إياد نصار: المجتمع بيسمح للراجل الفنان إنه يكبر، لكن مش للست، ومش منطقي نعتمد على الشكل والجيم في تقييم الممثل

انتقد الفنان إياد نصار المعايير المجتمعية غير العادلة التي تُمارس ضد المرأة، لا سيما في مجال التمثيل، مؤكدًا أن نظرة المجتمع للمرأة عند تقدمها في السن لا تزال تحمل قدرًا كبيرًا من التمييز.

وخلال لقائه مع الإعلامية لميس الحديدي في برنامج "كلمة أخيرة" على قناة ON، أجاب على سؤال الحديدي : ليه  الستات دايمًا بيتعرضوا للتنمر لما يتقدموا في العمر، أما الراجل لا يكبر ويعجز وشعره يبيض، الناس تقوله قمر؟ليرد إياد قائلاً : “ بسبب النظرة دي عمر الفنانة المهني يتم تقصيره، رغم إن عمر الفنان المهني المفروض يكون طويل ومش مرتبط بسن محدد”.

وأضاف:"كل مرحلة عمرية فيها سحرها الخاص، وكل فنان بينضج فيها بطريقته، لكن الغريب إن المجتمع بيسمح للراجل الفنان إنه يكبر، لكن مش للست، وده تناقض كبير".

وعن أثر الزمن، تابع قائلاً: “الزمن لازم يسيب أثره على الممثل، في الشكل والمضمون، مش منطقي إن ممثل يفضل زي ما هو من العشرينات للخمسنات”.

وعقبت الحديدي بأن المجتمع ذكوري ويطلب من المرأة أن تظل جميلة طوال الوقت، ليعلّق إياد قائلًا: “المشكلة إن فيه ناس بتربط الشكل بجودة التمثيل، يقولك مثلًا: الممثل ده شكله حلو، روح يعمل المشهد، طب أنا مالي بشكله، لو بنتكلم عن الشكل، يروح يعمل إعلانات أحسن، إحنا بندور على ممثل عنده قدرات مش بس شكل”.

وأضاف: “سمعت ممثلين بيقولوا: علشان تبقى نجم، لازم يبقى جسمك حلو ودمك خفيف، لما سمعت الكلام ده كنت عاوز أعمل زي ابن رشد، أحرق كل الكتب اللي قريتها في حياتي”.

واختتم قائلاً:"مش ممكن دي تبقى معايير الحكم على ممثل، لو على الجسم، أي حد يقدر يروح الجيم ويعمل فورمة مثالية في شهرين، لكن الموهبة، الموهبة ما تتقلدش، ودي اللي بتحدد الممثل الحقيقي".