سهير رمزي تستعيد ذكريات "حتى لا يطير الدخان":عادل إمام روحه خفيفة

استعادت الفنانة الكبيرة سهير رمزي ذكرياتها مع أحد أبرز أدوارها السينمائية في فيلم "حتى لا يطير الدخان" مع النجم عادل إمام، مؤكدة أن هذا الفيلم يُعد من أشهر أعمال السينما المصرية التي لا تزال تحظى بمتابعة حتى اليوم.

كواليس من أعمال سهير رمزي 

وأضافت سهير رمزي، في مداخلة هاتفية مع الإعلامية نهال طايل ببرنامج تفاصيل، المذاع على قناة صدى البلد، قائلة: "أنا كنت فيه بشخصية سنية البنت البسيطة الغلبانة جدًا، مكافحة، تركيبة ثانية غير الشخصية اللي في الأفلام اللي كنت بعملها، حتى ملامح وشي كانت مختلفة تمامًا".

وتحدثت سهير رمزي، عن التحضير لتلك الشخصية قائلة: "أنا عملت الشخصية بناءً على الورق اللي بيحكمني، يعني أنا لما بقرأ ما ليش دعوة بسهير رمزي بقى خلاص، أنا داخلة في مين دي؟ اللي قدامي بتعمل إيه؟ شكلها إيه؟ بيئتها إيه؟ اتولدت فين؟ مين أمها؟ مين أبوها؟ مين اللي رباها؟ هي فين؟ تركيبتها فين؟ ده بعيد عن أي حاجة من أي شخصية عملتها وعن سهير رمزي نفسها، وبروح أعمل التركيبة الجديدة دي، بس كده، وربنا الحمد لله بيوفقنا فيها يعني".

كواليس العمل مع عادل إمام 

وتطرقت سهير رمزي للحديث عن كواليس العمل مع النجم الكبير عادل إمام، مشيدة بروحه المرحة وخفة دمه، قائلة: "ما أقولكيش بقى على خفة الدم، مش محتاجة أقولها دي أصلًا، وبيبقى ريلاكس جدًا، وبيبقى عنده مود حلو، ما بيحبش يصور في أي حاجة متنشنه أو كده، وبعدين على طول بيضحك، وعلى طول بيقول إفيهات، وعلى طول مبتسم... ربنا يديله الصحة والعافية يا رب".