شريف إكرامي عن قرار لجنة التظلمات: المشهد مكشوف والتجميل مبقاش ينفع

أصدر شريف إكرامي، حارس مرمى نادي بيراميدز بيانا رسميا، تعليقا على قرار لجنة التظلمات بشأن مباراة القمة وذلك بمنشور عبر حسابه الرسمي على موقع إكس.

وكتب إكرامي: "قرار لا يحتاج خبير ليكشف عواره، ولا اللائحة محتاجة متخصص علشان يوضح ثغراتها.. المشهد مكشوف والتجميل مبقاش ينفع، ارتعاش اللوائح وتفصيل القرارات أصبح جزءا أصيلا من ثقافة المنظومة وسببا أساسيا في تدهورها.. وعشان نقدر نبني منظومة تحترم نفسها وتتطور، ثبات القرار واستقلالية القواعد من أي عوامل خارجية هو حجر الأساس".

وقال: "وسط الارتباك ده، بيظهر نوع تاني من الخطر، بيظهر ناس بتقبل الظلم والتدليس لما يكون في مصلحتها وبتجتهد في اختراع مبررات عشان تمحي بيها شعورها بالذنب، وده للأسف بيكشف التناقض بين قيّمهم وأفعالهم، بس التبرير عمره ما بيمحي الحقيقة بالعكس ساعات بيعرّيها أكتر خصوصًا لما نكون قدام حالة تدليس واعي ومتعمد، وده أخطر من الكذب، لأنه بيغّلف الباطل بقناع المنطق ويوهمك ان الغلط صح".

وأضاف: "وكالعادة، هيتحول الجدل من مناقشة قرار مشوّه لتبادل اتهامات، وتخوين، وتشويه كل صوت مختلف، وكأن المشكلة مش في القرار، لكن في اللي بينتقده.. وعمومًا الكورة زيها زي الدنيا،قيم الناس الحقيقية بتبان فيها وقت الاختبار. في النهاية كامل احترامي لكل من اختار ضميره قبل انتمائه لأن الحق ما بقاش بيتقال مش عشان الناس نسيته، بس عشان بقوا خايفين يدفعوا تمنه".