إمام عاشور: اندهشت روح لاعبي الأهلي والجميع ساعدني للتسجيل وأنا محظوظ

وصف إمام عاشور، نجم وسط النادي الأهلي، هدفه الأخير بأنه "الأفضل" في مسيرته، مؤكدًا أن لحظة تسجيله كانت استثنائية، ليس فقط بسبب روعة الهدف، ولكن لما حملته من مشاعر ودعم جماعي من زملائه داخل الملعب.

وقال عاشور، خلال ظهوره في برنامج "الكورة مع فائق": "الهدف ده هو المفضل عندي، لأن كل زملائي كانوا عاوزيني أجيب جول، لما بصيت في وشوشهم، حسّيت إنهم بيدفعوني للتسجيل، وده شيء عمري ما شوفته قبل كده."

وتابع: "عمر كمال قال لي: (طول ما انت بتصلي على النبي، هتسجل)، ووسام أبو علي لعب دورًا مهمًا، لما قرر يبدل مكانه معايا في الدقيقة 80، وقال لي: (خش لجوه وأنا هروح على الطرف)، علشان الكرة كانت بتجيله كتير."

وأضاف عاشور: "الكرة لما وصلت لحسين الشحات، كنت واثق إنه هيتصرف صح، ولو المدافع قرب منه، كنت متأكد إن مروان عطية هيوصلها لي. فعلاً حصل، والكرة جات زي ما كنت متخيل." 

واختتم تصريحاته قائلًا:"مش بس الهدف هو اللي فرّحني، لكن إحساسي بزمايلي وهما بيخافوا عليّا وعايزيني أفرح هو اللي فرق أكتر. لحظة زي دي بتفضل محفورة في القلب، وبتخلي الهدف ده الأغلى في حياتي."