"عمري ما حسيت إني ممثل".. آسر ياسين يكشف عن بداياته الفنية

كشف الفنان آسر ياسين مساء اليوم، خلال لقائه مع الإعلامية إسعاد يونس في برنامج "صاحبة السعادة"، عن بداياته الفنية ودخوله الوسط الفني رغم معارضة أسرته خصوصاً والدته، بالإضافة إلى موقف طريف يجمعه بالفنانة الراحلة سهير البابلي والتي تنبأت بعدم استمراره في الفن بسبب شخصيته الخجولة.

وقال أسر ياسين خلال لقائه: "وأنا صغير عمري ما حسيت إني هبقى ممثل، كل حاجة حصلت صدفة أنا دخلت هندسة الجامعة الأمريكية، وكان مسرح الجامعة وقتها قوي جداً، من ضمن أعمدته المخرج محمود اللوزي واتعرفت على المسرح هناك وحبيته جداً، ومن قبل التخرج كنت محدد إن ده الطريق اللي عايز أمشي فيه".

وأضاف "ياسين": "أهلي وقتها ماكانوش موافقين خصوصاً والدتي، وكانت بتكلمني كل يوم تعيط وتقولي أنت بتضيع مستقبلك إحنا عيلة موظفين ومهندسين أنت بتعمل إيه".

وتابع: "بابا اتعامل معايا بشكل منطقي وقالي إديني خطة، فقلتله لو في خلال سنة محققتش مؤشرات نجاح واضحة إني ممكن أنجح، هرجع للهندسة اللي أصلاً ما بدأتش فيها كانت بالنسبالي زي صلاة استخارة، إنك تسعى وتسلم والسعي بيقولك الطريق ده نتيجته إيه وأنا كنت مطمن".

واستكمل حديثه عن الفنانة الكبيرة سهير البابلي وتعاونه معها في مسلسل قلب حبيبة: "وقتها قالتلي أنت بذوقك وأدبك ده مش هتكمل، لأن الوسط ده عايز ناس عندها شو أنا بطبيعتي مش كده  فركزت في الشغل أكتر، وربنا رزقني بناس كويسة في طريقي فرشولي السكة".

وأوضح: "خلصت السنة وقدرت أتكفل بنفسي مادياً، وأهلي وقتها بدأوا يطمنوا كل الناس اللي وقفت جنبي والتوفيق اللي جالي ده من عند ربنا، وده شيء أنا ممتن له جدًا".

واختتم حديثه عن تطوراته الفنية قائلاً: "أنا حريص على التنوع بين الأدوار، علشان أكون راضي عن نفسي كممثل حسيت إني لازم أعيش في شخصيات مختلفة، ومينفعش أكرر نفسي لأني لو عملت ده مش هبقى صادق والجمهور هيحس".