أحمد فتحي في حوار مع "المدينة": دوري في اللعبة الجزء الخامس مفاجأة وفي شخصيات جديدة بالمسلسل

يواصل الفنان أحمد فتحي تألقه من خلال مشاركته في أحدث أعماله الدرامية والذي يحمل اسم "اللعبة" الجزء الخامس، بعد نجاح المسلسل المواسم الماضية. 
وبدأ أحمد فتحي تصوير المشاهد الرئيسية حالياً تمهيداً لعرض العمل عبر منصة شاهد في موسم جديد يحمل الكثير من المفاجآت والمواقف الكوميدية المعتادة.
وكان لموقع "المدينة" حوار خاص مع النجم أحمد فتحي، للكشف عن خطواته المقبلة وأهم ما يحمله مسلسل اللعبة في جزئه الجديد حيث جاء الحوار كالآتي:
في البداية كلمنا عن دورك في مسلسل اللعبة الجزء الخامس؟
دوري في اللعبة الجزء الخامس هيكون مفاجأة كبيرة جداً، لأن لسه بلعب دور سعدون الدين حسين صاحب مازو وإللي مخسره على طول، ولكن الجديد هيكون هو مفاجأة وأتمنى يعجب الجمهور.
ممكن نعتبر الجزء الجديد أصعب جزء في السلسلة؟
مسلسل اللعبة مش سهل زي ما البعض متخيل، وكل أجزاء المسلسل كانت صعبة، والجزء الجديد هو نفس درجة الصعوبة ورغم كدا هو عمل رائع ومبهج وفي حالة من السعادة لكل صناع العمل أثناء التصوير.
إيه المختلف إللي الجمهورهيشوفه من شخصيتك المرة دي؟
صعب طبعاً أقول دوري شكله ايه، اللي أقدر أقوله ان في اختلاف جذري كبير جداً في شخصية سعدون، وخلي الناس هي اللى تشوف وتحكم على الاختلاف دا عشان منحرقش الأحداث.
مين من الفنانين خرج من الجزء الجديد؟
الحمد الله مفيش حد من الفنانين بيخرج من أبطال اللعبة.
هيبقا في نجوم جديدة هتننضم للمسلسل؟
طبعاً في زي محمد عبده الممثل الرائع عضو فرقة بلاك تيما الموسيقية، ومعنا ميشيل، ومعنا ناس لسه هيقولوا عنهم.
لو النهاردة أول يوم تمثيل ليك، ما هي النصيحة اللي ممكن تقدمها لنفسك بعد الخبرات والسنين دي كلها؟
بعد كل الخبرات الكبيرة دي، هقول لنفسي هتمثل بس ومش هتعمل أي حاجة تاني ولا تاخد بالك من أي حاجة، وهتقف قدام الكاميرا وتبقا واحد تاني وأول ما يقول أكشن هتبقا الشخصية اللي هتقدمها وتمثل كأنها أخر مرة ليك، وهكسر الدنيا.