عمر بدر: التقمص سبب صعوبة دوري في «قهوة المحطة»

كشف الفنان الشاب عمر بدر عن تفاصيل مشاركته في مسلسل "قهوة المحطة"، الذي عُرض ضمن موسم دراما رمضان 2025، وحقق تفاعلًا كبيرًا على وسائل التواصل الاجتماعي.

وأوضح عمر بدر، في لقاء خاص مع الإعلامي شريف نور الدين، ببرنامج "أنا وهو وهي"، المذاع على قناة صدى البلد، أنه واجه تحديات نفسية وفنية كبيرة في أداء شخصية المدمن، خاصًة مع الدور المركب الذي قدمه في مسلسل "قهوة المحطة"، مؤكدًا أن الدور يحمل مخاطر الوقوع في النمطية والكليشيهات المعتادة، إلا أنه حرص على تقديمه بشكل مختلف.

وتابع عمر بدر، قائلاً: "الدور كان صعب، وممكن العادي جدًا زي ما قلنا يقع في فكرة الكليشيه والنمطية لدور المدمن أو كده، ما عملتش كده، ومع إنه كان في ريسك في الشكل وفي الحاجات وكده".

وأضاف عمر بدر قائلاً: "هو صعوبة الدور إن أنا عندي مشكلة في التمثيل، إن لما باجي بعمل دور، بحب قوي أتقمص، فدور زي ده ما ينفعش أتقمصه... لأنه مدمن! هتدمنه؟! فما ينفعش أروح أضرب حقنة وأجي".

وأكد عمر بدر أنه يعتمد على ذاكرته الانفعالية وتجارب رصدها من الشارع لتجسيد الشخصيات المعقدة، قائلاً: "إحنا طول ما إحنا ماشيين عينينا بتسيف حاجات، ودننا بتسيف حاجات، لأن ممكن في لحظة تقع في دور زي ده وأنا ما لحقتش أجهز له في وقت التصوير، فلو ما كنتش مجهز من قبل كده وعندي في الذاكرة الانفعالية حاجات كتير، ما كنتش هعرف أطلعه الحمد لله بالشكل اللي طلع بيه".

وأشار بدر إلى أنه قام بزيارة مصحات علاج الإدمان كجزء من تحضيره للدور، قائلاً: "جهزت للدور إن أنا أروح مصحات، رحت مصحات، حضرت جلسات، واتكلمت مع دكتورة متخصصة في علاج الإدمان... الدكتورة زينة، بوجه لها الشكر من خلالك".

وعن أبرز النصائح التي تلقاها أثناء التحضير، أوضح عمر بدر، قائلاً: "قالت لي أهم النقط اللي أشتغل عليها كمدمن... يعني المدمنين بيحسوا بإيه؟ لأن الدور كان في لحظات كتير، في الأول أول ما ابتدى يدمن، وبعد كده بيدخل مصحة. ففكرة إن أعراض الانسحاب والحاجات دي بيحصل فيها إيه نفسيًا أكتر من جسديًا".

وتحدث عمر بدر عن أجواء كواليس العمل، قائلًا:"كنت مع أحمد غزي وبيومي فؤاد، طبعًا مسلسل تقيل الحمد لله، مهم... بس الكواليس كانت لطيفة جدًا والله، كل الناس كانوا بيساعدوني، أستاذ بيومي فؤاد كنا نقعد نشتغل في البروفة قبل التصوير، فكان يلاقيني في حاجة يقولي: ما تقول هنا كده، بيساعد جدًا".